Saturday 17 February 2018

පැ ර දු නේ ක වු ද ?

මැතිවරණයක ජය පරාජය තමන් කැමති ඕනෑම රසකාරක අනුපාන හෝ තිත්ත අබිං දමා විග්‍රහ කර ගැනීම ඕනෑම පක්ෂයකට පුද්ගලයෙකුට කාගෙන්වත් බාධාවක් නැත. රට ඉලක්ක කරමින් දෙන මැතිවරණ ප්‍රතිඵලයේ සමස්ත පණිවුඩය ඒ නිසාම විකෘතියකි. උගතුන් බුද්ධිමතුන් දේශපාලන විචාරකයින් නිර්ණායකයන් තෝරන්නේ හැම වතාවේදීම එකම විදියටය. හඳුනාගැනීමේදී 2015ත් ඊට පෙර විග්‍රයන් හෝ 2018 විග්‍රහයන් අතර වචන එහා මෙහා කිරීමක් හෝ රටාවේ වෙනස මිස පරණ තැටියමය. 

මැතිවරණ ප්‍රතිඵලය තුළ මට හැඟී යන පරිදි කතිරය හෝ කතිරකාරයා රටේ ඉදිරි ගමනට කිසිසේත් තීරණාත්මක වී නොමැත. රට ගම පාලනයට සංවර්ධනයට සුදුස්සන් ‍තෝරා ගැනීමේදී කතිරකාරයාගේ භාවිතය ඉතිහාසය පුරාවට අසාර්ථකය. වචන නාස්ති කර ගැනීමකින් තොරව පවසතොත් 2015 අගෝස්තු වරද කතිරකරු නැවත වටයකින් කර තිබේ. ජවිපේට වැඩි බලයක් දීම මෙවර ද අතපසු කර තිබේ. බොහෝ ප්‍රතිඵල විශ්ලේෂකයින් භාවිතයෙන් හුදු කතිරකාරයාට වැඩි ඉහළ තැනක නැති නිසා ඔවුන්ගේ විග්‍රහයන් තුළ ජවිපේ ලබන කතිරයට නිසි තැනක් නැත. ඔවුනට අනුව මේ මැතිවරණ ප්‍රතිඵලය මෛත්‍රීට රනිල්ට පාඩමක් ඉගැන්වීමකි. 2015 දී පවසා සිටියේරාජපක්ෂලාට පාඩමක් හැටියටය. කතිරකාරයාගේ භාවිතය ඔවුන් විග්‍රහ කර ගන්නේ තමන්ගේ භාවිතයට සාපේක්ෂවය. ආණ්ඩුව පැ‍රැද්දූ ඡන්ද පාඩම් ඡන්ද හැටියට ගනිද්දී ආණ්ඩුවට පක්ෂව දුන් ඡන්ද කුමක්දැයි පැවැසීම මග හැර ගොස් තිබේ. පොදුවේ ඡන්ද කොයිකත් හුදු කතිර වශයෙනුත් ඡන්දදායකයා කතිරකාරයා වශයෙනුත් මගේ හඳුනාගැනීමයි. 

කතිරකාරයා හිස නැති කවන්ධයක් බව මගේ පෙර ලිපියක ද සඳහන් කළෙමි. කතිරකාරයා ඡන්දදායකයා බවටත් කතිරය ඡන්දය බවටත් නිවැරදි වෙනතුරු රට ගොඩ ගිය මැතිවරණ ප්‍රතිඵලයක් සිතා ගත නොහැක. 2015 මැතිවරණයේදී වැඩි බලයක් ජවිපේට නොදීමේ විපාකය දිනෙන් දින වඩ වඩාත් රටට දැනෙමින් තිබේ. රට පුරා නිල පොලීසියක් හමුදාවක් සිටියද ආර්ථික ඝාතකයින්ගෙන් දූෂකයින්ගෙන් ජාතික දේපල හොරා කන වනචරයින්ගෙන් රටට වෙන අනතුර අවම කර ගන්නට නම් වැඩි බලයකින් ජවිපේ සවිබල ගැන්විය යුතු බව ඔලුව නැති කතිරකාරයාට වැටහීමක් නැත. වැඩි බලයකින් ජවිපේ සන්නද්ධ කිරීමේ කතිකාව මග හැර යන්නට ජවිපේ හොඳ හෝ නරක බැරි පුළුවන්කම් බාධාවක්කර ගැනීම තවදුරටත් සිදුවන්නේ නම් එය වරදකි. මේ ලියන මා ජවිපේ ක්‍රියාකාරිකයෙක් හෝ සගයෙක් නොවේ. නොපෑහීම් සහ ජවිපේ සමග ගැටළු මට ද තිබේ. නමුත් රටේ දූෂණය නාස්තිය ගැන නොපමාව සිතීමේදී විකල්පය ජවිපේය.

මේ මැතිවරණ ප්‍රතිඵලය තුළ සිදු කළ වෙනසක් නැත. පිරිසක් උද්දාමයට පත්වීමත් පිරිසක් සසල වීමත් කෘත්‍රිම ලෙස උත්කර්ෂයට නැංවීමක් මිස මැතිවරණයක මේ සාමාන්‍ය තත්වයයි. දිනන්නේ සුපුරුදු ඔළු ටිකමය. පැරදුනේ සුපුරුදු ඔළු ටිකමය. පශ්චාත් මැතිවරණ කසු කුසුව ද වගාලාප ද පුරුදු එකමය. වෙන එකක් තබා ප්‍රතිඵල නිකුත් කිරීමේ කොමාගේ යාන්ත්‍රණය ද සුපුරුදු අංග විකල බවම ප්‍රකට කළේය. දේශපාලනය හොරුන්ගෙන් මුදා ගැනීමට මූල්‍ය ‍රැකවරණයට ආර්ථික සංවර්ධනයට ජාතික සංහිඳියාවට සාධනීය බලපෑමක් කෙරෙන ප්‍රතිඵලයක් මේ මැතිවරණය තුළින් රටට දී නැත. 

කතිරකාරයා ඡන්දදායකයා බවට උසස් කර ගත යුතුය. දියුණු කර ගත යුතුය. එතැනට එන තෙක් ජවිපේ සදහටම ඔතනය. රට ද එතැනමය. අවසන් වුනු පළාත් පාලන මැතිවරණයේදී ජවිපේ සිතා ගෙන සිටියේ රටේ ගොඩනැගෙමින් තිබුනු ආණ්ඩු විරෝධය හොර රහසේ නොකර සද්දයෙන් ඇවිදින් ජවිපේ වටා ඒකරාසී වනු ඇති බවය. නමුත් එය ඒකරාසී කර ගන්නට සමත් වූයේ රාජපක්ෂ කඳවුර බව ජවිපේ අනුර දිසානායකම මේ වනවිට පිළිගෙන තිබේ. තමන් වටා ඒකරාසී වෙන තෙක් නොසිට ඒකරාසී කර ගැනීම අනුරට වඩාරාජපක්ෂ දැන සිටියේය. ගොඩනැගුණු ආණ්ඩු විරෝධය ඇත්ත වශයෙන්ම සංවිධානය කළේ ජවිපේය. අතට ගත්ත දේ කටේ දමා ගන්නට ජවිපේ රාජපක්ෂ කඳවුරෙන්වත් ඉක්මනින් උගත යුතුය. කතිරකාරයාට සැබෑ ඡන්දදායකයෙක් වීමේදී ජවිපේ පූර්වාදර්ශයක් වන්නේ එවිටය. 
Share:

Thursday 1 February 2018

කතිරකාරයාගේ පෙබරවාරිය- ඔබ ඇවිත් යන්න එන්න!


මැතිවරණය එන්නේ එල්ලය බලා ජනතාවගේ බඩටය. කතිරය යන්නේ දේශපානඥයාගේ සාක්කුවටය. කතිරයෙන් ගොඩ ගිය පසු ආණ්ඩුව, සභාව හෝ දේශපාලනඥයාට කතිරයත් කතිරකාරයාත් නැවත අවශ්‍ය ඊළඟ මැතිවරණයටය. කතිරකාරයාටම අනුව ජනතාවගේ පරමාධිපත්‍යයයනු එයයි. තව ලෙසකින් එය ජනතාවගේ සර්වජන ඡන්ද බලය හෝ මොකක් හෝය. ධන බලය කාය බලය පිරිස් බලය ඇත්තන් උනුන් බෙලි කපා ගනිමින් ජර පත් පුරාණ කඩු හරඹය වෙනුවට ඉරි කැබල්ලකින් ඉරි කැබැල්ලක් කපා බෙල්ලයි රජකමයි දෙකම බේරා දෙන පැන්සල් කොටයේ දේශපාලන බල හරඹය රට වැසියා මත කවර අර්ථ කථනයෙන් පවරා දුන්නද අවසාන අර්ථයේදී බෙල්ල යන්නට නියමිත රට වැසියාගේය. ඔළුව නැති කතිරකාරයෙක් මැතිවරණ ප්‍රතිඵලයේ තීන්දුකාරක සාධකය වූයේ ඊට අනුවය.

රට දන්නා තරමට බහුතර කතිරය හුදෙක් කතිර කොලය අතට ලැබෙන දාට පමණක් පෑනක් පැන්සලක් හොලවන්නෙකුගේය. තැපැල් ඡන්දය හෝ සාක්ෂරතාව පිළිබඳ ප්‍රවාදය කතා කරන්නේ නම් තනි වාක්‍යයකිනුත් පුළුවන. මෙතෙක් තමන් පුරුදු පුහුණු කරනු ලදුව තිබෙන යාන්ත්‍රික ක්‍රියාවලියම තැපෑලෙන් ද ප්‍රකට කරමින් සිටින බවය. එය කාඩ්බෝඩ් රාමුවක් තුළ තමන් විසින් තමන්ගේම හෘද සාක්ෂිය සීමා කර ගනිමින් ඉරි කැබැල්ලකින් ඉරි කැබැල්ලක් කපා කුරුට්ටන කතිරයමය. තීරකයා ද නිරීක්ෂකයා ද ඒ මොහොතේ තමාම යැයි දැන සිටි බවට සිහි කල්පනාවක් ඒ කතිරය තුළ ද විරලය. පක්ෂය පාට හෝ පුරුදු පුද්ගල ප්‍රතිරූපය ඉදිරියේ දපනය වීමක් පමණි. කතිරය කුරුට්ටන්නේ නාස්තියට දුෂණයට පීඩනයට පක්ෂවීමක් විපක්ෂවීමක් සිතා නොවේ. තමන් කුරුට්ටන කතිර කොළය යොමුවන එකා මොන අපතයා වුනත් ඌ දිනවීමටය.

තනි තනිවත් කුඩා හෝ විශාල කණ්ඩායම් හැටියටත් ජනවර්ග හෝ පන්ති හැටියටත් උගත් නූගත් වශයෙනුත් විසිර පවතින කතිරකරුගේ දේශපාලන ව්‍යවහාරය අත් හැර සලකනවිට කතිරකරු ලෙස මේ ඉන්නේ ජනතාවය. ජනතාව ලෙස ඉන්නේ කතිරකරුමය. කතිර සමයේදී නිදහස් සාධාරණ මැතිවරණයක් ලෙස එන ජන අභිලාෂය තුළ ඉන්නේ ද කතිරකරුමය. වේදිකාවට ගැලපෙන වඩාත් සංදර්ශනාත්මක හෝ වඩාත් ප්‍රචාරාත්මක වචනයන්ගෙන් පවසතොත් කතිරකරු හෙවත් ජනතාවගේ අභිලාෂය වන්නේ ජනමතයට ගරු කරන ප්‍රචණ්ඩත්වයෙන් තොර මැතිවරණයකි. අපේක්ෂාව වන්නේ මැතිවරණයෙන් පසු යහපත් සමාජයක් සාධාරණ වෙළඳ පොළක් හොඳ ජීවන තත්වයක් වුවද මැතිවරණයෙන් පසු එවැනි ආශ්චර්යයක් අත් නොවිඳින්නේද මේ කතිරකරුමය. ජන අභිලාෂය හෝ ජනතා අපේක්ෂාව ලෙස මැතිවරණ සමයේ එන කතිරකාරයාගේ කේවල් වාක්‍යය එක අතකින් තමන් තමන්වම අන්දා ගැනීමක්ද සැක සහිතය. කතිරයෙන් බලයට පැමිණි පසු දේශපාලඥයා නාස්තියේ හොරකමේ යෙදෙන විට උගේ ආරක්ෂාව වෙනුවෙන් කඩේ යන්නේ ද නාස්තිය හොරකම සාධාරණය කරමින් උත්තර බඳින්නේ ද අපේක්ෂා බිඳගත් ජනතාව හෙවත් මේ කතිරකාරයාමය. ජන අභිලාෂයට පස්ස හරවා ගත් දූෂිත පුද්ගලයන් බලයට පත් කරවන බහුතර කතිරයේ නිරූපිත ජන මතය කිසි ලෙසකින්වත් අව්‍යාජ නැත. පුද්ගලික වාසිය පක්ෂය පාට පුද්ගල ප්‍රතිරූපය ඉදිරියේ තනි වූ විට හෝ ඡන්දපොළේ කාඩ්බෝඩ් රාමුව තුළ කො‍ටු වූ විට මේ අවාසනාවන්ත කතිරකාරයා දෙබිඩ්ඩෙකි. 

කතිරය සැකයෙන් තොරවම බල අරගලය සුජාත කරයිද යන්න ඒ අනුව තවදුරටත් ගැටළුවක් නොවේ. නිරීක්ෂණ කංඩායම් තත්ව සහතිකය නැතිව මේ සුජාත බර කරත්තයට අඩියක ගමණක් නැත. මැතිවරණ කොමසාරිස්, රජයේ නිළධාරින්, ත්‍රිවිධ හමුදාව, පොලිසිය, නිරීක්ෂණ කංඩායම් සහ පාතාල කල්ලි යන සකලවිධ බළ ඇණි මේ කියන අජූත භාවයේ පංගුකාරයන්ය. සියලු ජන මාධ්‍ය ඔස්සේ ද ගෙන් ගෙට ගොස් ද අල්ලස් හෝ විකල්ප ක්‍රම ඔස්සේ ද පැන්සල් කොටය මෙහෙයවන පුරුදු දේශපාලන සදාචාරයම ඊළඟ මැතිවරණයේදීත් ප්‍රත්‍යක්ෂය. කතිරය පරණ පුරුදු හැඩයේ පරණ කතිරයමය. ඊළඟ මැතිවරණයේදීත් කතිරකරු පරණ කතිරකරුමය. ඊළඟ පශ්චාත් මැතිවරණ කසු කුසුවද පරණ එකමය. අලුත් වගේ පෙන්වන පරණ පොරොන්දු ගොඩක් සහිත අලුත් වගේ පෙන්වන පරණ ඔළු ගෙඩි සංඛ්‍යාවකින් පත් කරගත් අලුත් යැයි කියන ආණ්ඩුවද පරණ එකමය. 

කිසිදා අලුත් හෝ පරණ නොවන ප්‍රපංචය චන්දදායකයාය. මන්ද යත් චන්දදායකයෙක් මැතිවරණය තුළ නැති බැවිනි. සැඟවුනු අමුත්තෙකි. සඟවා තැබූ අමුත්තෙකි. බල අරගලයේදී තීරණාත්මක නිසා කරළියේ මැතිවරණය රඟ දැක්වුන ද චන්දදායකයා ආයිත්තම් කෙරන්නේ ප්‍රචාරක ශීර්ෂ පාඨයට පමනි. ඒ අනුව මැතිවරණයට පෙර සිටම චන්දදායකයා යනු අවලංගු ඡන්දයකි. ඡන්ද පත්‍රිකාව මත කුරුට්ටන භූමිකාව පැවැරී තිබෙන්නේ කතිරකාරයාටය. නමුත් මැතිවරණයෙන් පසු ඡන්ද පොළේදීම අතහැර දැමෙන්නේය. මුරකාවල් මැද ගණන් ගැනෙන්නේ අනුහස් ඇති කතිරයයි. ඡන්දදායකයා අතුරුදන් කරමින් පවත්වාගෙන යන මේ වැනි දේශපාලන ක්‍රමවේදයක් තුළ සර්ව ජන ඡන්දය පුස්සක් බවට පත් කොට ඇත. කොම්පියුටර් ජිල්මාට් කතා ඇත්තක් නම් ජනතා පමාධිපත්‍යය ද මිත්‍යාවකි.

සංක්‍රාන්තික කතිරකාරයෙකුට එහා ගිය සැබෑ ඡන්දදායකයෙකු හදා ගැනීමේදී සිවිල් සමාජ බලවේග අසමත්වීමත්, ඡන්ද පෙට්ටියේ මුද්‍රාව කතිරකාරයා වීමත් හෝ චන්දදායකයා අතුරුදන් වීමත් පයිසෙකට මායිම් නොකරමින් කතිර ගොඩ පහුරුගා ජන මතය ගණනය කරන අප්‍රබුද්ධම ක්‍රියාවලියක් මැතිවරණය ලෙස නාමකරණය වී ඇත. කොම්පියුටර් ජිල්මාට් ගැටලුව 2015 මැතිවරණයේදී විසඳී තිබුනේය. පරාජය වූ හැම මැතිවරණයකදීම කොම්පියුටර් ජිල්මාට් චෝදනාව නැගූ පිරිස ජය ගත් මැතිවරණයේදී එවැන්නක් සිදු නොවුන බවට නිවේදනය කළේය. ඒ අනුව කොම්පියුටරය දැන් ඒ අපවාදයෙන් ගොඩය. නමුත් ජනතාව අත් විඳිමින් සිටින රටේ දේශපාලන සදාචාරය තුළ කොම්පියුටර් කතා නැතත් කතා කරන්නට මහා පරිමාණ ජිල්මාට් සුලබය. කතිර ගොඩ මදිව අකුළාගෙන ගෙදර ගිය දූෂිත නාමධාරියා ගිය පයින් ආපිට හැරී ධූරාවලියේ හිටපු තැනම නැවත සිට ගැනීම පරාජිත දූෂිතයාගේ මෙන්ම ජයගත් දූෂිතයාගේද සාංගමික ජිල්මාට් එකකි. පක්ෂ දෙකක එකවර සාමාජිකත්වය දැරීම හෝ විවෘතවම ක්‍රියාකාරී ලෙස හැසිරීම මාර ජිල්මාට් එකකි. වොයිස් කට් දෙමින් හිනා වෙමින් බන්ධනාගාර රෝහල් ගතව- සුවපත්ව- පෙරට වඩා බලවත්ව- ඉතා ඉක්මනින් එළියට ඒම හෝ නීතියෙන් කට්ටි පනින්නට නීතියම යොදා ගනිමින් අධිකරණ නියෝග මත අත් අඩංගුවට පත් නොවී සිටින පට්ට දූෂිතයා ආශ්චර්ය සහ ජිල්මාට් අතර නන්නත්තාර වන්නට කතිරකාරයාට උරුම කොට තිබේ. 

කතිරකරු යනු දූෂණයේම අර්ධයකි. දූෂණය පහසු කරවා ගැනීමට අනුමත කරවා ගැනීමට නිපදවා ගත්තකි. දූෂිතයා හෝ දූෂණය හඳුනා ගැනීමේ සංවේදී බව හෝ ස්වකීය ගෞරවය අභිමානය පිළිබඳ දත්තයන් ද කතිරකරුගේ යාන්ත්‍රික ක්‍රියාවලිය තුළ නැත්තේ එබැවිනි. මෙතෙක් පැවැති හැම මැතිවරණයකදීම කතිරය ගණන් කිරීමෙන් පසු කතිර කොලය කතිරකරු සහ කතිරය ලබාදීමට වැඩ කළ සිවිල් සමාජ බලවේග යන සියල්ලම පැත්තකට දැමුනු බව කතිරකරුට සංවේදී නැත. ජනවරම හිස් ටින් එකක් කළ අතීතයක් සහ වර්තමානයක් අනාගතය සඳහා ද එයම නොකරනු ඇතැයි සහතිකයක් ද කතිරකරුට අවශ්‍ය නැත. අල්ලසට වාසියට හෝ මෙතෙක් කළ දූෂණ අක්‍රමිකතා යටපත් කර ගැනීමට පක්ෂය මාරු කිරීම හෝ මාරු කරවා ගැනීමේ හිරිකිත ප්‍රයෝගය කතිරකරු ඉදිරිපිට එදත්- අදත් සිදු කෙරෙමින් තිබේ. මේ නිසා මැතිවරණ ප්‍රතිඵලයේදී දකින්නට ලැබෙන යථාර්ථය ඉතාමත් සාමාන්‍යය. කතිරකාරයාගේ ප්‍රතිවාදියා සැබෑ ඡන්දදායකයා මිස මෙවැනි දූෂිතයන් නොවේ. සැබෑ ඡන්දදායකයාට විරුද්ධව සිය කතිරය පාවිච්චි කරන කතිරකරු ඡන්දදායකයා තමන් යැයි බරපතල ඇන්දීමක මාට්‍ටුවී සිටී. දූෂිතයා බලයට පත්වෙන්නේ නිතරඟයෙනි.

2018 මැතිවරණ වසර මේ උදාවී ඇත්තේ මෙබඳු අදේශපාලනික ව්‍යවහාරයක් ඇති රටකටය. පරමාදර්ශයන් විශ්වාසයන් හෝ අපේක්ෂාවන් හෑල්ලුවට ලක් කිරීම ඔස්සේ කතිරකරු සිවිල් සමාජ බලවේග සමග සන්ධාන ගතවීම වැළැක්වීම ක්‍රමය බවට පත්ව ඇති රටකටය. යහපාලනය අවුලක් වෙලා තිබුනත් යමපාලනය ගලවා දැමීමේ 2015 ජයග්‍රහණය තළු මරන්නට ලොකු ඉඩක් විවෘත කොට තබමින් ඔළුව නන්නත්තාර කරනු ලැබ ඇති ජනතාවක් සිටින රටකටය. ඇත්තටම ඡන්දදායකයා අතුරුදන් කළ මැතිවරණයක යථාර්ථය එසේය. නමුත් අන්ත පරාජයකින් රට බේරා ගන්නා මැතිවරණයක් නම් අවම වශයෙන් 2015 සංක්‍රාන්තික කතිරකරුවත් තවම සිටිය යුතුය. නැවත දන්වන තුරු සේවය අත්හි‍ටුවා ඇති සිවිල් සමාජ බලවේග ඒ තහනම නොතකා මේ සඳහා දිගටම සක්‍රීය විය යුතුය. සැකයට තුඩු දෙන කාරණය නම් 2015 උපන් ඒ සංක්‍රාන්තික කතිරකරුගේ හිරි ඔතප් බි‍ඳෙන වල්කම් පසු ගිය වසර දෙක තුන තුළත් අද පවා සිදුවීමය. 

තමන් නුසුදුස්සන් දූෂිතයන් බැවින් ඊනියා ප්‍රජාතන්ත්‍රවාදීන් කතිරය කෙරෙහි ද විශ්වාසයක් අද වනවිට නැත. බලය සඳහා වශ්වාසය තබා සිටින්නේ මැතිවරණ හරඹයේදී වියදම් කරන මුදල් ප්‍රමාණය, යොදවන මැර බලය, මුර බලය, මැතිවරණ නීති උල්ලංඝණය කිරීම කෙතරම් දුරට කළ හැකිද සහ එවැනි කොන්දේසි සම්පූර්ණ කර ගන්නා අනීතික ක්‍රමවේදයන් කෙරෙහිය. මේ කරන්නේ දේශපාලනය යැයි කට කොණකින්වත් ඉතින් කිව හැකිද? මේ අශුද්ධ ජාවාරමකි. 2010න් ඈතට නොගොස් ගණන් බැලූ විට එදා ඇමතිකම් කළ පුද්ගලයන් 34කගේ ගසාකෑම පමණක් ජන මාධ්‍යයට අනුව රු. කෝටි 1,5000 කි. මෙදා බැඳුම්කර වංචාව කෝටි 8,000කි. මේ ඉලක්කම්වල ඇත්ත නැත්ත කොයික වෙතත් හොරකම මෙච්චර නොවේ. ඉමක් කොණක් නැත. මේ පාඩුව නිසා විඳවන්නේ කතිරකාරයාම වුනත් කතිරකාරයා ද මේ සියල්ලෙහි වගඋත්තර කාරයෙකි. පංගුකාරයෙකි. 2018 පළාත් පාලන හරඹයට අපේක්ෂිකාවකගෙන් ඇඟ මස් ඉල්ලුවේ ද කතිරකාරයා නොවේ. ඒත් කතිරකාරයා ඊට ද වගකිව යුතුය. සැබෑ ප්‍රජාතන්ත්‍රවාදය රටට අවශ්‍ය කර තිබේ. පි‍ටුවහලේ සිටින ඡන්දදායකයා ගෙන්වා ගැනීම 2018 මැතිවරණයෙන් පටන් ගත යුතු එබැවිනි. නමුත් දූෂණය හඳුනා ගැනීමේ තාක්ෂණය විද්‍යාව කලාව හෝ සාමාන්‍ය දැනීම ආසන්න කර දෙමින් කතිරකරුගේ බුද්ධිමය සීමාව පුළුල් කර දෙන සමාජ කතිකාවතට ප්‍රවේශයක් රට තුළ මේතාක් නැත. සිදුවිය යුත්තේ නම් එයයි. රට හදන්නට විද්‍යාර්තීන් ශිල්පීන් වෘත්තියවේදීන් රටේ නැති නම් පිටින් ගෙන්වා ගත හැක. ඡන්දදායකයා බවට සකස් කර ගත යුත්තේ උසස් කර ගත යුත්තේ කතිරකාරයාමය.
Share:

Saturday 27 February 2016

අපි මේ හදන්නෙ වව්ලාගේ මගුල් ගෙදර යන්න


ගෝලීය වෙළඳපොළ මිහිතලය මත බිහි විය යුතුමය. ගෞරවණීය ජීවිතයක් නිවහල් මරණයක් මිනිස් වර්ගයාට එතෙක් මෙතෙක් නොමැත. නමුත් අත්විඳින්නට සිදුව තිබෙන අහේතුව නිෂ්පාදකයාත් වෙළෙන්දාත් පාරිබෝගිකයාත් ප්‍රතිවිරෝධී ශක්තීන් වශයෙන් වෙන්ව පැවැතීමය. පාරිබෝගිකයාගේ මිළ දී ගැනීමේ ශක්තිය දුර්වල කරවන ධනවාදී මූල්‍ය කළමණාකරනය මානව සංහතියේ අපේක්ෂා භංග කරමින් සිටී.
පාරිබෝගිකයෙක් සහ වෙළඳ පොළක් නැති ඉතිහාසයක තිබුණේ ප්‍රාථමික පරිභෝජනයක් පමණි. වෙළඳාම සමාජ සංවර්ධනය සම්බන්ධයෙන් අනිවාර්යක්වූ විට අංකුර පාරිබෝගිකයෙක් බිහි කරමින් ක්‍රමයෙන් හට ගත් ප්‍රාථමික වෙළඳ පොළක් පූර්ව ධනවාදී යුගයන්හීදීද අපට දැක ගතහැක. ‍තෝරාගත් වෙළඳ බෝග සහ අප්‍රධාන භාණ්ඩ කිහිපයක ප්‍රවර්ධනය හැරුණ කොට සාපේක්ෂ වෙළඳ පොළ ආකෘතියක් ලෝකයට හඳුන්වාදීම යටත් විජිත යුගයේදීද මග හැරී ගියේය. අම්මා පාවිච්චි කළ මහන මැෂිම දියණියටත් දියණියගේ දියණියටත් වශයෙන් පරිබෝජන වටිනාකම පරම්පරා ගනනාවක් පුරා එක තැන නතර වී තිබුනේය. තවත් මහන මැෂිමක් එකතු කෙරුනේ නැත. තාත්තා පරිහරණය කළ උපකරණය හෝ භාණ්ඩය  පුතාගේද ජීවිත මෙවලම බවට යටත් කළ ප්‍රාථමික කුල ක්‍රමයත් ජාතිකවාදයත් ආගමිකවාදයත් කාර්මික විප්ලවයෙන් සියවස් කීපයකට පසුද ලොව පුරා සමහර තැනවල තවමත් පවතියි. යම් දවසක අන්තර්ජාතික වෙළඳ පොළ මහ පාරට පැමිණියේ නම් ඒ පැමිණියේ නාස්තිකාර ජාවාරමක් ලෙස හෝ වෙළඳ පොළසූරා කෑමේ යෝධ යාන්ත්‍රණයක් හැටියටය.
ධනවාදී ප්‍රාග්ධනයේ ආරම්භක යුගය වෙළඳපළ හැදී වැඩී පෝෂණය වන්නට නිරෝගී ගර්භාෂයක් මෙන්  විය. නමුත් පසුව එළැඹුන එහි හොඳම කාලයේදී ධනවාදය ක්‍රමයෙන් කොල්ලකාරී වෙමින් වඩ වඩාත් ම්ලේච්ච වෙමින් ප්‍රාග්ධනය හිංසන අවියක් කරගත්තේ මිහිමත බිහිවන්නට විළිරුදා දුන් නිවහල් වෙළද පොළ වහාම ගබ්සා කොට දමමිනි . ගෝලීය වෙළඳ පොළ යනු ධනවාදී ප්‍රාග්ධනයට අනුව අධිරාජ්‍යවාදී මූල්‍ය යාන්ත්‍රනයමය. ඒ සඳහා අවශ්‍ය තරමට වැඩියෙන් උදාහරන ලෝකයා ඉදිරි පිට ඇත. ඛනිජ තෙල් සහ දියමන්ති අපනයනයකරුවෙකි නයිජීරියාව. නමුත් ඒ සඳහා වන අන්තර් ජාතික වෙළඳපළේ පංගුව දියමන්ති සහ ඛනිජ තෙල් උදුරා ගෙන යන ධනවාදී ප්‍රාග්ධන හිමිකාරීත්වයටය. ඝානා, මාලි, බුකීනා කැෆේ අන්ත දුගී රටවල්ය. ආර්ජන්ටිනාවද සරු රටක් නොවේ. නමුත් නිපදවන්නේ රත්තරංය. ගොඩ ඒමක් මේ රටවලට නැත්තට නැති කරමින් මේ ධන සම්පත පොදි ගහ ගනිමින් සිටින්නේ ලෝක බැංකුවත් ජාත්‍යන්තර මූල්‍ය අරමුදලත් මගිනි. ඉරාකය සහ ලිබියාව සුනු විසුනු කළේ ඛනිජ තෙල් සම්පත උදුරා ගන්නටය. ඒ ඛනිජ තෙල් වෙළඳපළම සිරියාව මරණයේ අඩවියක් කරමින් තිබේ..
වෙළඳපළ  ප්‍රාණ ඇපයට ගැනීම ධනවාදී ප්‍රාග්ධනය විසින් කිසිදා අත් නොහරින්නකි. යටත් විජිත රටවලට ඊනියා දේශපාලන නිදහස දුන්නාය කියන්නේ ආර්ථික වශයෙන් නව යටත් විජිතවාදයක් බිහි කර ගනිමින් බව දැන් හොඳටම පැහැදිළිය. අම්මා මුත්තා කාලෙවත් රට මෙච්චර ණය වී නැතැයි කියන්නට අපට සිදුවී ඇත්තේ එබැවිනි. ඖෂධ සහ කෘෂි රසායන මා‍ෆියාව ලෝකයම ලෙඩ කරමින්ද යුධ අවි ජාවාරම්කරුවන් ලෝකයම තනි සොහොන් යායක් කරමින්ද  අන්තර්ජාතික වෙළඳ පොලේ වැඩිම පංගුකාරීත්වය හිමිකරගෙන සිටී. තුවක්කුවක් පොලිස් නිළධාරියා අතට දුන්නද තුවක්කුවක් නිපදවීමේ මුක්තිය ඒ පොලිස් නිළධාරියා අයත් රටට නැත. ඇත්ත තත්වය නම් කාර්මික රටක් ලෙස අන්තර් ජාතික වෙළඳ පොළේ පංගුවක් අත් පත් කර ගැනීම අපට අවුරා ඇත. කාර්මික විප්ලවයේ ජයග්‍රහණය මිහිතලය පුරා පැතිර යාම වලකාලමින් ලෝක බැංකුවත් ජාත්‍යන්තර මූල්‍ය අරමුදලත් හරහා ධනවාදී ප්‍රාග්ධනය ප්‍රතිවිප්ලවය සිදු කළේය . 
ලෝකයම වේදනාකාරී ඉරණමකට යටත් කළ අපකීර්තිමත් ජාත්‍යන්තර වෙළඳ පොළ ගැන අඩුම බරින් කථා කළොත් එසේය. නොපවතින - යෝජිත හෝ කතිකාමය ගෝලීය වෙළඳ පොළ මේ අනුව මට නම් විෂුවලයකි. රටවල් යටත් කොට කීකරු කොට තබා ගැනීමට භාණ්ඩ වෙළඳ පොළ සහ මූල්‍ය වෙළඳ පොළක් ධනවාදී ප්‍රාග්ධනය සඳහා දැනටමත් පවතී. ඝ්Sඵ් + දීමත් උදුරා ගැනීමත් නැවත දීමට කේවල් කිරීමත් වඩ වඩාත් වටහා යුත්තකි. අපගේ අකීකරුකම කුමක් වුවත් යුරෝපීය රටවල් අපගේ මාලු මිළදී ගැනීම අතහැර දැමුවේ දඬුවමක් වශයෙනි. ජාත්‍යන්තර වෙළඳ පොළ කිට්‍ටු වූ යම් දුර්වල රටක් නම් සම්බාධක ගැන බියක් නිතර සිහි තබා ගත යුතුය. දෙන දෙයක් කා වෙන දෙයක් බලාගෙන කීකරුකමට සිටිය යුතුය. රුසියාව බිය නැත. ඉරානය බිය නැත. බෙහෙවින් ශක්තිමත් ඔවුනගේ යැපීම් මාර්ග බිඳ දැමිය හැකි නොවේ. දශක ගනනාවක් තිස්සේ ඇමරිකානු ආර්ථික සම්බාධක පැවැතියද දරා ගැනීමේ හැකියාව කියුබාවට තිබිණ. ගෝලීය වෙළඳ පොළ පිළිබඳ විෂුවලයෙහි දිග පළල වටහා ගත යුත්තේ පවතින මෙවැනි තත්වයන් සැල්කිල්ලට ගනිමිනි.  
ඉක්මනින් ගොඩ ගිය හැකි ගෝලීය වෙළඳ පොළක් යනුවෙන් අප අදහස් කරන්නේ සංචාරක කර්මාන්තය හෝ එබඳු සේවා ඔස්සේ උපයන විනිමයද. බහුජාතික සමාගම්වල ඒජන්තවරභාවය ලබා ගැනීම ඔස්සේ විනිමය ඇද ගැනීමද. ඒ ඕනෑ එකක් වේවා මේ ලිපිය මගින් අදහස් කරන්නේ ස්වීය ආර්ථිකයක් ධනවාදී ප්‍රාග්ධනයට යටත් ලෝකයක ප්‍රවේශම් සහගත මෙහෙයුමක් බව අඬ ගා කීමටය. වෙළඳපළ වගවීම මේතාක් හඳුනා නොගත් නිසාම ලොවින් තුරන් වන්නට නියමිත ධනවාදී කළමනාකාරීත්වය ඉතා බිහිසුනු හැසිරීමක් ලෝකය තුළ ප්‍රකට කරමින් සිටින බව රහසක් නොවේ. සිය ඒකාධිපතීත්වය පර්යන්තයේ රටවල් මත තබා යැපීම රුසියාව චීනය අභිබවා යමින් කෙසේ හෝ පවත්වා ගැනීම ඔවුනගේ ඉලක්කයයි. පැහැදිලිවම ලෝක බලතුලනය දෙබෑවෙමින් තිබේ. ගෝලීය වෙළඳ පොළ විෂුවලයක් අපට දෙන්නේ ඔවුන් මුහුන දී තිබෙන මෙන්න මේ අසීරු අවස්ථාවේ අග්ගිස්සේදීය.
නමුත් මා මුලින් පටන් ගත් තැනට නැවත නොපැමිණ මා ලිපිය අවසන් කිරීම නොකළ යුත්තකි. ගෝලීය වෙළඳ පොළ බිහිවිය යුතුමය. ගෞරවණීය ජීවිතයක් නිවහල් මරණයක් මිනිස් වර්ගයාට එතෙක් මෙතෙක් නැත. එහෙත් ඒ උත්කෘෂ්ඨ ගෝලීය වෙළඳ පොළ යනු නික්ම යන්නට නියමිතව සිටින ධනවාදී මූල්‍ය කළමනාකරණය එල්ලී ගනිමින් තව කලක් ‍රැඳී සිටින්නට මවා පෙන්වනු ලබන විෂුවලය නම් නොවේ.

ලිව්වේ නැදිමාලේ මිනිහෙක්
Share:

Wednesday 17 February 2016

පහේ නොවන ශිෂ්‍යයාගේ රචනය


නම් දෙකකින්ම මේ සිවුපා සත්වයා ප්‍රසිද්ධය. නරියා හෙවත් හිවලාය. ඒකියන්නේ ඌට ඇත්තේ හයිබ්‍රිඩ් හෝ ඩුවෙල් ප්‍රසිද්ධියකි. කපටි වෙලාවට කපටිය. බුද්ධිමත් වෙලාවට බුද්ධිමත්ය. මේ නිසා ස්ථාන උචිත ප්‍රඥාව, ප්‍රඥාවට උචිත ඉවසීම, ඉවසීමට උචිත නිහතමානීකම ඇතුලු සියලු උචිතයන් මේ සත්ව තෙමේ තුළ පිහිටා ඇති බව කට වසා ප්ලාස්ටර් දැම්මත් කිව යුතුය. කිව යුතු කාලයද එළැඹ තිබේ.
නරියා තුළ වන හික්මුණු ගුණය උදාහරනයෙන් කියතොත් ඌ මනුෂ්‍යයෙක් නූනද තුන්වෙනි ශික්ෂා පදය නොබිඳ ‍රැක ගත් සිවුපා සතෙක් විය. ඒ නිසා උගේ නෑදෑයෝ හැමදාම සිවුපා සත්තුමය. නරියෝමය. ගමහාමිනේලා ගමරාලලා සමග ලේ නෑදෑකමක් ඇති කර ගත්තේ නැත. මිනිස් ලේ සමග නරි ලේ ලේ මුහු කළේම නැත. එහි විද්‍යාත්මක ප්‍රතිපලය ලෙස ගම රාලලාගේ ගමහාමිනේලාගේ ලේ නරක් වූයේ නැත. ලේ නරක් වූයේ නැති නිසා ගමරාලලාට ගමහාමිනේලාට නිතර නිතර ලේ කෝපය නැමැති රෝගය වැළඳුනේද නැත. ඒ නිසා ගමරාලලා ගමහාමිනේලා සාමාජීය වශයෙන් හරි හොඳ මිනිසුන් විය. නෑදෑයෝ එක්කත් හොඳය. අසල් වැසියෝ එක්කත් හොඳය. කැළේ සතා සිවුපාවා එක්කත් හොඳය. ගම්මුන්ගේ යහපතත් නම්බුවත් කැළේ සතාගේ යහපතත් නම්බුවත් ‍රැක ගන්නට නරියා සමත් වූයේ එසේය. ලැජ්ජාවෙන් බයෙන් තොරව තමන්ගේ ඥාති වරිගයාට මුහුන් දීමේ හැකියාවද මිනිසුන් ජීවත්වෙන ගම්මානය අසළට එන්නටත් ඇවිත් යන්නට නිදහසත් නරියාට තිබුනේ ඒ නිසාය. ගමේ නිෂ්පාදිත ෆ්‍රෙස් චිකන් කන්නටද ලැබුනේය.
නරියා ලොවම කතා කරන සත්වයෙකි. නරියා ලොවටම කතා කරන සත්වයෙකි. වරෙක ඌ ලෝකයා වෙත ගියේ උපදේශකයෙකු ලෙසනි. වරෙක උදවු කරන්නෙකු වශයෙනි. ඒ නිසා සතුන් අතර පවා නරියාට උසස් පිළිගැනීමක් තිබුනේය. එක්තරා දවසක එක හිත හොඳ මිනිසෙක් උගුලකට හසු වූ කොටියෙක් බේරා ගත්තේය. පසුව උගුලෙන් බේරුන ඒ කොටියා ඒ හිත හොඳ මිනිසාව මරාගෙන කන්නට හදද්දී ඔතනට පැමිණි නරියාට සාම නියොජිතයෙක් ලෙස පිළිගැනීම ලැබුනේය. සාධාරන පරීක්ෂණයකට බලයද හිමි විය. ඒ අනුව මිනිසාගේ හිත හොඳකම ආරක්ෂා කර ගැනීමේ වැදගත්කම ලොවටම කියා දෙමින් කොටියා නැවත ඒ උගුලටම යවා තිබුණේය. මිනිසා බේරා ගෙදර යවා තිබුනේය.
එසේ අභියෝගාත්මක දේට ඉදිරිපත් වන්නා සේම නරි තෙමේ සිය වර්ගයාගේ ගෞරව අභිමානය ‍රැක ගන්නටද දිවි දෙවැනි කොට ඉදිරිපත් වූ බව අප දනිමු. දවසක් දා සිය දියණිය නරියෙකුට පාවා දෙන්නේ යැයි නරි වරිගයා පහත් කොට සලකා ගම ගෙදරකින් කළ නින්දා පරිභවය නරි තෙමේ නෑසූකන්ව සිටියේ නැත. ගම දියණිය විවාහ කර දී නරියෙකු වන තමාව ගම ගෙදර බෑනා කර ගන්නා තෙක් නොබියවම අරගල කළේය. එහෙත් එසේ කළේ නරි වරිගයාගේ නම්බුව පිණිස බව පැහැදිළිය. මිනිස් ලේ සමග මුසු වෙමින් දෙපාර්ශවයටම අගතියක් කර ගන්නට නොවේ.
අවස්ථාව අනුව කෙසේ හැසිරුනද, නරියා උගේ තරම හොඳින් දැන සිටි නිහතමානි සතෙක් බවද තවදුරටත් කිව යුතුය. ශරීර ශක්තිය අනුව සමහර ලොකු වැඩ තමාට තනියම නොහැක. නමුත් තමාගේ නුවන අනුව නොකළ හැක්කක් නොමැති බවද දැන සිටියේය. ගොදුරක් සොයා ගැනීමේදී වුවත් නරියා ක්‍රියා කළේ ඒ අනුවය. එහෙත් වනගත රෙජිමයක් තුළ එය ඊට වඩා පුලුල් අර්ථයෙන්ද ගත හැකි අවස්ථා තිබුණි. දවසක් පුෂ්ටිමත් ගොන් නාම්බෙකුගේ මොළේ කන්නට නරියාට දැඩි සිතක් ඇති විය. එයද නරියාට තනියෙම කරගත හැකි සුලුප‍ටු කාර්යක් නොවේ. නරියා ඒ සඳහා යොදා ගත්තේ සිංහයාගේ බාහු බලය සහ රෙජිමයේ බලය අල්ලා ගන්නට තිබුණු ගොනාගේ බල ලෝභයයි. බල ලොභයෙන් අන්ධ වූ ගොනාව බලකාමයෙන් උද්ධච්ච වූ සිංහයා ළඟටම කැඳවා ගෙන ගොස් මරවා ගැනීම නරි බුද්ධියට ඉතා සුලු කාරනයක් වූයේය. ඉක්බිති ගොනා මරවා ගත් පසු නිදහසේ නිවීහැනේ නා පිරිසිඳු වී ගොන් මාංශය වළඳන ලෙස ආරාධනානුකූලව සිංහයා දෙවෙනි වතාවටත් මෝඩ කරවා දොළට පිටමං කළ නරි තෙමේ ගොනාගේ මොළය නිදහසේ නිවීහැනේ තනියෙම අනුභව කළේය. වැඩිහිටි ගමරාලලා ගමේ අර්ථයෙන් මුල් කාල්යේදී දැන සිටි පරිදි බල තන්හාසයේ ආනුභාවයෙන් පිටස්තරයන් ගම සූරාගෙන පොදි ගහ ගන්නා හැටි පසු කාලයේ ඔවුහූ නව ලිබරල් ලෝක ක්‍රමය ලෙස මෙසේ උගත්තේ නරියාගෙනි.
එකමත් එක තවත් දවසක නරියා හොඳටෝම ගුටි කන වැඩක් කරගනිමින් ගම්මුන්ට තවත් පාඩමක් කියා දුන්නේය. සිංහ හමක් පොරවාගෙන ගැමියන්ගේ විචාර බුද්ධිය පරීක්ෂා කරන්නට ගම්මානයට ගියේය. හැමදාම මෙන් එදාද මිනිසුන් වරද්දා ගත්තෝය. වටකර පහර දුන්නේ පොරවා ගෙන සිටි සිංහ හමටය. නරි හමට හෙවත් හරි නමට නොවේ. මේ ආකාරයට නරියාගෙන් උගත් දෑ පසු කාලයේ බිහි වූ බුද්ධිමතුන් පාසැල් පොත පතට පවා එකතු කර ගත්තෝය. අපේ වේදිකා නාට්‍ය කලාව පෝෂණය කරන්නටද යොදා ගත්තෝය. ගම දියණිය විවාහ කර ගැනීමේ කතාව නාට්‍යාකාරයෙන් ඉදිරිපත් කරන දයානන්ද ගුණවර්ධන නාට්‍යවේදියානෝ ප්‍රකාශ කරන්නේ නරි තෙමේ බෑනාකමට ‍තෝරා ගත්තද පසුතැවිල්ලට හේතුවක් කිසි කල මිනිසුනට ඇති නොවන බවය.
එහෙත් මේ සා වැදගත් වූ නරි තෙමේ මේ සා කාලයක් මිනිසුන් වන අපගේ ලේ පරම්පරාවට අයිති නෑයෙක් නොවේ. නෑයෙක් නොවුනත් මේ සත්වයාගේ බුද්ධිමත් බව ක්‍රියාශීලී බව උපායශීලි බව ප්‍රබෝධමත් බව ඉඳුරාම කිව යුතුය. බඩ පුරවා ගත් පසු පැත්ත වැටී නිදා ගත්තේ නැත. බඩ ගිනි වූ පසු පමනක් නැගිටින කුසීතයෙක්ද නොවේ. බාහු බලය ඇතිවුන්ගෙන් පවා නුවන යොදා වැඩ ගත්තේය. ශබ්ද නගා ගෙරවීම වෙනුවට ජය ගත්තේ නිහඬව ඉවසිල්ලෙනි. වනගත රෙජිමයේ අනෙක් සතුන් තර්ජනයෙන් යටත් කර ගන්නට ගියේ නැත. නරියා හෙවත් මේ සිවල් රජු උඩඟු නැත. ඒ නිසා කැළයත් ගමත් දෙකම ඇසුරේ ජීවත් වන්නට ඌ සමත් විය. කැලයේ අනෙක් සතුන් ගෙන් වෙන්ව ඔලුව අවුල් කරගෙන ගලක් උඩට වී බලාගත් අතේ බලාගත්වන ඉන්නට සිදු වූ සතෙක්ද නොවේ.
කරුණු මෙසේ හෙයින් කැළෑවත් ගමත් දෙකම ජය ගත් එකම වනසතා සිවලා හෙවත් නරියාමය. ගරු ගම්භිර පෙනුමක් වෙනුවට චාම් සරළ බවකුත් විශේෂ කාය ශක්තියක් වෙනුවට විශේෂ ඥාණ ශක්තියකුත් ජාන පරම්පරාවෙන්ම උරුම කොට ගත් ජන හද දිනූ නරි තෙමේ රටක ජනපතිකමට පවා සුදුසුය. විපක්ෂ නායකකමට පවා සුදුසුය. හිටපු ජනපතිකමට පවා සුදුසුය. නමුත් මිනිස්සුන් සමග ලේ නෑදෑකමක් පිණිස කරන ආරාධනයක් ආයාචනයක් නම් නරි තෙමේ නැට්ටෙන්ම ප්‍රතික්ෂෙප කරනු ඇත.
[ලිව්වේ නැදිමාලේ miniහෙක්]
Share:

එන්න ආප්ප කා කෝපි බොන්න


මහාවිරු සැමරුම මහා කලබැගැනියක් කරගන්නට පෙරුම්පිරූ සිංහල මහාජාතිකවාදීන් පස්ස බිම ඇන ගත්තෝය. මුලුමහත් දෙමළ ජනතාවම එක පිටියට ගොනු කරගනිමින් සියලු දමිළ දේශපාලන නායකයින් එක වේදිකාවට ‍රැස් කරමින් සිංහලයාට එරෙහිව දමිළ ලෝකයේ මෙතෙක් කළ අති විශාලම ජාතිකවාදී ‍රැළියක් මහාජාතිකවාදීනගේ සිහිනය විය. නමුත් මේ මහාජාතිකවාදීන් පැතූ තරම් විශාල සංදර්ශනයක් දමිළ ජාතිකවාදීන්වත් නොසිතූ බව හොඳටම පැහැදිලිය. තමනට සෑහීමට පත් විය හැකි ප්‍රමාණික සැමරුමක් දමිළ ප්‍රජාව අතර සිදු විය. මහින්දවාදී මේ මහාජාතිකවාදීනගේ දුෂ්ඨ අරමුණ බිඳ දැමීම ගැන දෙමළ ප්‍රජාවට අපගේ ප්‍රණාමය හිමිවිය යුතුය.
දකුණේ සිරිපාලලා මරා දැමූ විට කිරි බත් කෑවෝ සිටියහ. උතුරේ මාඩසාමිලා මරා දෑමූ විට කිරි බත් කෑවෝ සිටියහ. දකුණේ සිරිපාලලා හෝ උතුරේ මාඩසාමිලා මරා දැමීම සාධාරනයි සිතුවෝ සමඟ එකඟවීම නොවීම දීර්ඝ සාකච්චාවකි. නමුත් සිරිපාලලා මාඩසාමිලා ඇසුරේ එකට හැදුණු වැඩුණු ඥාති මිත්‍රාදීනගේ ආධ්‍යාත්මය තුළ දැල්වෙන ඉටි පහනින් රට ගිනි තියන්නට යමෙකු සිතන්නේ නම් ඒ තුළ තමන්ම දැවී අලුවී යා හැකි බව ඔවුනට මතක් කර දෙන්නට අපි කැමැත්තෙමු. අමතක කර හිත හදා ගන්නට මිනිසා වඩාත්ම කැමති වන්නේ තමන් ඇසුරේ මිහිරි අමිහිරි මතක ගොන්නක් ඉතිරි කරමින් යන්නට ගිය තම ඥාතියා හිතෛෂියා මිය ගිය බව හෝ අතුරුදන් වූ බවමය. හොඳයි කියා සිතේ නම් තම ආධ්‍යාත්මය සාටකයේ ඔතා සමූහ මිනීවලක මිහිදන් කරන්නට කැමති කෙනෙකුට පුලුවන. නමුත් සාමදානයෙන් සැතපීමට ඒ කුණපයට කිසිදා නොලැබෙනු ඇත.
30 වසරක ලේ වැකි සංග්‍රාමය නිමා කළේ දමිළ ජනතාව තව දුරටත් පීඩණයට සහ නොනිල වාරණයට ලක්නොකරමින් නම් – මරා දමුණු හෝ සිරගත කළ වුන් හැරුණු කොට ඔවුනගේ ඥාතිවරයන්ද මරණයේ අඳුරු සෙවනැල්ලටත් නොනිල සිර බතටත් යොමු නොකළේ නම් – ඔවුනගේ ගම් බිම් ගේ දොර ඔවුන් වෙත කඩිනමින් මුදා හැරියේ නම් – මළවුන් සම්බන්ධ සමරු පිංකම් ගෘහස්තව ගෙයින් ගෙට සීමා කර ගන්නට මේ වන විටත් තමන් යොමු වී අවසන් බවඋතුරේ ප්‍රජාව අද වනවිට ඔප්පු කරමින් තිබේ. දේශපාලනඥයින්ගේ උවමනාවන් වෙනුවෙන් පිට්ටනි ගානේ ගොනුවෙන උවමනාවක් ජනතාවගෙන් ප්‍රකට නොකෙරිණ. මහින්ද රාජපක්ෂගේ බරපතල අදූරදර්ශී බව හෝ ආඥාදායකත්වය තව දුරටත් රටට අවශ්‍යයැයි ආප්ප කා කෝපි බොන්නට සැදී පැහැදී බලා සිටි මේ මහා ලොකු ජාතිකවාදීන් උඩ දමා අල්ලා ගන්නට බලා සිටි පංදුවට වෙච්ච දෙයක් නැත.
උපන් දිනය මියගිය දිනය හෝ වෙනත් සැමරුම් අවස්ථා දේශපාළනික උවමනාවන් මතද සිදුවිය හැකි බව යථාර්තයකි. ජාතිකවාදයේත් විරුද්ධවාදී දේශාපාළනයේත් තැති ගැන්මට හෝ විවේචනයටත් කුහකත්වයටත් ඒවා ලක්වීමද යථාර්තයට පිටින් ඇති ප්‍රලාපයක් නොවේ. අප්‍රේල් හෝ නොවැම්බරයේ ජ.වි.පේ විරුදින සැමරුම් මගින් උත්කර්ශයට පත් කෙරෙන ජ.වි.පේ දේශපාළන වේදිකාව දුරින් දැක නිලංකාර වූ දෑසින් දමිළ ජනතාවගේ මියගිය වුන් සැමරීම උපකල්පනය කිරීම මේ මහාජාතිකවාදීනට හොඳටම වැරදුන තැනයි.
ජ.වි.පේ විරුදින සමරුම් ජ.වි.පේ ක්‍රියාධරයනට පමනක් සීමාවූ හුදෙකලා වැඩකි. මෙතෙක් එය ඇති සැටියෙන් විග්‍රහ කර ගැනීමේ හැකියාව ජාතිකවාදීනට නොතිබීම එක අතකට ඔවුන් අනුකම්පා කටයුතුය. අලුතෙන් කියා දිය යුතුය. 71 හෝ 89 මර්ධනයන් නිමාවන විට දකුණු ලක තිබුනේ යුද්ධය අවසන් කළ උතුරු නැගෙනහිර තත්වයට අඩු තත්වයක් බව අමතක කළ යුතු නැත. දැඩි පීඩණයක් හෝ නොනිල වාරනයක් මියගියවුන්ගේ පවුල් මත ඒසා නොතිබිණි. සිරගත වූවන් හැර ඔවුනගේ බොහෝමයක් පවුල් ජීවත් වූයේ පුරුදු ගම්බිම්වල පුරුදු ගෙදරය. ඒ නිසා මිය ගියවුන් පිනිස කරන සැමරුම ගෘහස්තව ගෙයින් ගෙය සිදුවිය. ජ.වි.පේ තහනමට ලක්ව මුල් තිබූ කාලය නොවුනේද තත්වය එසේම වන්නට හේතු තිබිණ. දේශපාළනය ජනතාව ප්‍රියකරන විෂයක් බවට මෙතෙක් පත්ව නැත. ක‍ටුක දුෂ්කර ගමනක් පෙන්වා සිටින රළු දේශපාළනය උතුර දකුණ වෙනසක් නැතිවම ජනතාවට තිත්තය.
ජීවත් වීමේ සංවිධානය වීමේ කතා කිරීමේ අයිතිය ජනතාවට අහිමි වූයේ සිංහල වූ පමණින් වරප්‍රසාද ඉතිරි කරමින් නොවේ. ඇතමෙක් කෙසේ සිතුව ද ජ.වි.පේ ක්‍රියාධරයන් උතුරේ නොවීම හෝ දමිළ හින්දු නොවීම හේතුවෙන් ඔවුනගේ සගයින් සිහිකරන සමරුව සඳහා හිමි කරගත් විශේෂ අයිතිවාසිකමක් නැත. 89 දී ජ්.වි.පේ යැයි යි නම කියැවුන පමණින් ඔවුනගේ මළකඳන් මත ටයර් සෑය ඉදි වූයේ සිරුරෙන් වෙන් කරන ලද හිස ලී කෝ‍ටුවේ සි‍ටුවා ප්‍රදර්ශනයට තැබුවේ ඔවුන් උතුරේ නොවී දකුණේ වී සිටියදීමය. දමිළ හින්දු නොවී සිංහල බෞද්ධ වී සිටියදීමය. කොටස්වලට වෙන් කරන ලද ඔවුනගේ මළ සිරුරු බල්ලන්ට කපුටන්ට කබර ගොයින්ට කන්නට දී සිංහල බෞද්ධ යුධ සෙබලුන් මුර කලෝය. සිය කැමැත්තෙන්ම ගොස් පොලිසියට හමුදාවට බාර වූ මිනිසුන්ද මරා දැමූ අවස්ථා තිබිණ.
උතුරක් දකුණක් හෝ ජාතියක් ජන්මයක් රාජ්‍ය මර්ධනයේදී නැත. බහුතර ජනතාවගේ භීතිය හෝ නිහඬ අනුමැතිය අතර සියල්ල සිදු වීය. එහෙත් නැවුම් මුට්ටියේ කිරි බත් පිස කන්නට පිරිසිඳු ආධ්‍යාත්මයක් ඇති මිනිසුනට අද හිත හදා ගත හැක. රාජ්‍ය මර්ධනයත් එක්ක එක පෙරමුණේ සිටගත් මහාජාතිකවාදයක් ගොඩනගා ගැනීමට උතුරු යුද්ධය නිසා සමත් වූ මහින්ද විමල් ගම්මන්පිල වාසු දිනේශ් වැනි අපතයන් අසමත් කිරීමද උතුරෙන්ම පටන් ගෙන තිබීමය.
ලිව්වේ නැදිමාලේ miniහෙක්
Share:

Saturday 23 January 2016

සැබෑ ඩමිය, බොරු ඩමිය හෝ ඔරිජිනල් එක, පීචං එක සෙවීම උඩින් පල්ලෙන් බැලුවත් තේරුමක් තිබේ.



තහනම් උත්තේජන චෝදනා නොහොත් නව ලිබරල්වාදය අග්‍රාමාත්‍ය රනිල් වික්‍රසිංහ මහතාට එරෙහි විරෝධතාවක්ව තිබියදීම අය වැය සම්මත වූයේ ඔහු නිදොස් කොට නිදහස් කිරීමෙන් නොවේ. චෝදනාකරුවන් අනාථ කරමින් තුනෙන් දෙකක බහුතරයද හිමි විය. අගමැති රනිල් ඔහුගේ ඉවසිලිවන්ත බවටත් නම්‍යශීලී බවටත් සම්මානද හිමි කරගත්තේය. මෙසේ මේ අනුමත වන්නේ හෝ සම්මත වන්නේ අප දකින ආකාරයට මෙගා සිහින දකින්නන් ලබන සැරේ දෙනව බැටේ නරඹද්දී අත්ත බි‍ඳෙයි පය බුරෙලෙන් තබා යන්නට ප්‍රමාණික රනිල්ගේ ශූර බවය.
පරාජයේත් අපකීර්තියේත් අන්තයට එක අවුරුද්දකින්ම ඇද වැටෙන්නට රනිල් අණුවන නැත. ඔහු නොවැළැක්විය හැකි තත්වයන් වළකමින් සිටී. නායකත්වය පිළිබඳ තියුණු අභියෝගයෙන් යුත් පසුගිය කාල වකවානුව තුළවත් සිරිකොත අත හැර ගෙදර නොගිය රනිල් රාජ්‍ය බලය අතහැර ගෙදර යන හදිසියක කොහෙත්ම නැත. එහෙත් බලයේ ‍රැඳී සිටීම රනිල් හමුවේදී නම් විපක්ෂයේ සිටියාට වැඩි අවදානමකින් යුතු බව හොඳටම ඇත්තකි. විශේෂ පාර්ලිමේන්තුවක විශේෂ කැබිනට් මංඩලයක පමනක් නොවේ තමන්ට ඡංදය දුන් ජනතාවගේද ඇස් වසා කනින් රිංගා යන ගමනක් ඔහුට තිබේ. අයවැය යෝජනා සහ මුදල් ඇමතිවරයා ඩමි බවට පත් කර ගැනීම උපාය මාර්ගිකව වැදගත්කමක් අත් පත් කර ගන්නේ ඒ අනුවය. කල් යල් බලා සිදු කෙරෙන තමන්ගේ මැදිහත්වීමකට ඒ තුළ ඉඩ ඉතිරි කර ගනිමින්ම අය වැය යෝජනා සකස් වී ඇත. යෝජනා සම්බන්ධ විවාදයේදීත් සංශෝධනවලදීත් මුදල් ඇමති අභිබවා ගිය ආරූඪයක් ඔහු කෙරේ ප්‍රකට වීම පැහැදිළිවම පූර්ව සූදානමකින් යුතුය. දේශපාළන නායකත්වයේදී මැවුම්කාරයා තමාම බව ඉස්මතු කර ගන්නා ‍රැස් වළල්ලක් ලෝකයටම පොදුය.
වර්තමාන දේශපාළන හැදෑරීමකදී මහින්ද රෙජිමය අත් හළ නොහැකි ප්‍රපංචය ක් වන්නේ මේ නිසාය. මෛත්‍රී රනිල් පන්නයේ දෙමුහුන් ආණ්ඩුවක් නොවන්නා සේම එය ආණ්ඩුවක්ද නොවිණ. ප්‍රජාතන්ත්‍රවාදයේ සියලු ආයතන ඒ ඉදිරියේ ඩමියන් විය. සියලු පක්ෂයන්ගෙන් කැළේ පැන්නවුන් ඒ තුළ ගාල් වී සිටියෝය. ගාල ඊට වාල් වන්නට තරම් ‍රැස් වළල්ලක් අප දන්නා පරිදි ආරම්භයේදී ඊට නොතිබිණ. සිදු වූයේ ප්‍රභාකරන් පරාජය කිරීම සඳහා එක්සත් වූවන් විසින් එවැන්නක් ඊට ආරෝපනය කිරීමත් පසුව ඔවුන්ම ඊට වසඟවීම හෝ මෝහනයවීමත්ය. ඉක්බිති අවස්ථාවාදය වෙනුවෙන් පෙනී සිටිමින් දිවි හිමියෙන් එය ‍රැක බලා ගැනීමත්ය. රෙජිමය බිහි කරගැනීමේදී අසීරුවෙන් කරගන්නට කිසිවක් රාජපක්ෂ පවුලට ඉතිරි නොවින. ප්‍රභාකරන් අනුහසින් හෝ දේශප්‍රේමයේ ආනුභාවයෙන් සියල්ල පහල විය. ඉක්බිති ඩමි බවට පත් නොවුනේ රාජපක්ෂ පවුල පමණි. සෙසු සියල්ල ඩමිය.
රනිල්ගේ දේශපාළන භාවිතය ගැන ඉතිහාසය කියවීම හෝ අනාවැකි කීම මේ ලිපියේ අරමුණ නොවේ. නමුත් දීර්ඝ කාලින සූදානමක ප්‍රතිපලයක් විය යුතු අය වැය යෝජනා දිගින් දිගට සංශෝධනය වීම ඔහුගේ නව ලිබරල් ප්‍රතිරූපය මග හැර සාකච්ඡාවක් අපට නැති කළේය. ගැමි භාවිතය පරිදි මක මකා අකුරු කළ අයවැය යෝජනා නව ලිබරල්වාදයේ මුට්ටිය දැමීමකි. කිසියම් අහම්බීය ආශිර්වාදයකින් තද බල විරෝධයක් අයවැය යෝජනා සඳහා නොපැමිනියා නම් හෝ විරෝධය පාලනය කර ගැනීමට රනිල්ට ලෙහෙසියෙන්ම හැකි වූවා නම් හෝ අමු අමුවේම රවීගේ යෝජනා සම්මත වනු ඇත. අයවැය සම්බන්ධ කතාවේ ඇත්ත එවැන්නකි. මේ අනුව සැබෑ ඩමිය, බොරු ඩමිය හෝ ඔරිජිනල් එක, පීචං එක සෙවීම උඩින් පල්ලෙන් බැලුවත් තේරුමක් තිබේ. සම්මත වූයේ රවී ගෙනා අය වැය යොජනා නම් රනිල් වෙනත් වටයකින් පැමිණ රවී වැරදියි කියමින් එකතු කරන සංශෝධනයක් මෙහිදී රනිල්ගෙන් සිදු නොවනු ඇත.
තත්වය එසේ බැවින් රනිල්ගේ රට කිරීම සන්කළ විදිලි කෙටීමක් පමණකටම මුදල් ඇමතිවරයා හෝ අය වැය යෝජනා ඩමියක් වීම ලඝු කිරීමද ලාංකීය දේශපාළන සංස්කෘතියට අනුව අසම්පූර්ණය. කැමැත්ත අකමැත්ත කෙසේ වෙතත් රනිල් නියෝජනය කරන හෝ කො‍ටුවී සිටින ඔහුගේ ආර්ථික ප්‍රතිපත්තිය නව ලිබරල්වාදයයි. අනතුරක් වෙතැයි ජනතාව සිහිනෙන්වත් නොපතන ගේ දොර වැසිකිළිය ළිඳ හෝ බැංකුවේ තිබෙන සොච්චම වැනි අතිශය සංවේදී වත්කම් ජාවාරම්කාරීත්වයට ලක් කිරීම නව ලිබරල්වාදයයි.
අය වැයෙහි ඒ කොටස් මග හැර අනුමත කළ සංශෝධනයන් ටික දැනට ප්‍රමාණවත් කර ගත්තත් ඊළඟ පියවරට පෙර ස්ථාවර කරගත් තමන්ගේ ප්‍රතිරූපය සහ ඒ වටා ගොඩනගා ගත් නව රෙජිමයක් අද දවසේ ඔහුගේ ප්‍රමුඛ අවශ්‍යතාවයයි. රාජ්‍ය නායකයාගේ ප්‍රතිරූපය ලංකාවට සාපේක්ෂව කොතෙක් ප්‍රතිගාමී වුවද මුළුමනින්ම දේශපාළනික යථාර්තයකි. සමාජ පසුගාමිත්වය අඛණ්ඩව පවත්වා ගැනීමේදී මේ ප්‍රතිරූප ආරූඪය මහින්ද රාජ්පක්ෂගෙන් අවසන් වන බවක් අපගේ හැඟීම නොවේ. මහින්ද පාර්ලිමේන්තුවේ පසු පස ආසනයකට තල්ලු වී ගියද අවශ්‍ය නම් පාවිච්චි කරන්නට ලාංකීය ජනතාව තුළ පසුගාමීත්වයත් චන්ද්‍රිකා, සජිත්, රාජිත, ච්ම්පික වැනි හුරු පුරුදු රෙජිම කාඩරයින් පිරිසකුත් තවදුරටත් ඉතිරිව තිබේ. අවශ්‍ය ‍රැස්වළල්ල සඳහා මහින්ද රාජපක්ෂට සේවය කළ ප්‍රභාකරන්ගේ අනුහස හෝ දේශප්‍රේමයේ ආනුභාව වෙනත් ආකාරයකින් ඔහු සොයමින් සිටී.
අය වැය යෝජනා පළමුවැනි කියවීමේදී වැඩි ඡන්දයෙන් සම්මත විය. දෙවැනි කියවීමේදී වැඩි ඡන්දයෙන් සම්මත විය. තුන්වැනි කියවීමේදී වැඩි ඡන්දයෙන් සම්මත විය. හැම වතාවකම අය වැයෙහි වැදගත්කමට වඩා රනිල්ගේ ප්‍රතිරූපය මතු කෙරෙමින් සම්මතය සිදු විය. මා සිතන්නේ අය වැය යෝජනා සකස් කිරීමට සමගාමීව හෝ ඊටත් කලින් සිටම සංශෝධන සූදානම සිදු වී තිබේ.
අය වැය පමණක් නොව ආරංචි මාත්‍රවලට අනුව පක්ෂය තුළ සංශෝධනද රනිල්ට අවශ්‍ය කර ඇත. එජාප ආණ්ඩුක ස්ථාවරත්වය රනිල්ගේ බලාධිකාරිත්වයෙන් බැහැරව පැවැතිය හැක්කක් නොවේ. නව ලිබරල් ජාවාරම්කාරීත්වයටද ඔහුගේ වැදගත්කම එසේමය. ඔහු ඒ ගමන යමින් තිබේ. දහදිය මහන්සිය හෙළමින් උගුරේ ලේ රත්වන තුරු සටන් පාඨ කියමින් වෘත්තීය සමිති විසින් කරනු ලැබුවේද තුනෙන් දෙකේ සම්මතයෙන් රනිල්ගේ බලාධිකාරය ශක්තිමත් කිරීමය. සියයට අනූවක පමණින් තුනෙන් දෙකේ සම්මතය අනුමත කරමින් හිටපු ජනපතිවරයා කළේද එයමය. කතානායකවරයාගේ ස්තුතිය ඒ හැම ඩමියකටමය.

Share:
Copyright © miniහෙක් | Powered by Blogger Design by Asantha K. Mirissearachchige